பாலிவுட் சினிமாவின் முன்னணி நடிகை தீபிகா படுகோனே, தற்போது இயக்குநர் அட்லீ மற்றும் அல்லு அர்ஜுன் இணையும் புதிய பான்-இந்தியா படத்தில் கதாநாயகியாக அதிகாரப்பூர்வமாக இணைந்துள்ளார். இன்று (ஜூன் 8, 2025) அவரது, இன்ஸ்டாகிராம் பக்கத்தில் வீடியோ ஒன்றை வெளியிட்டு ரசிகர்களை உற்சாகத்தில் ஆழ்த்தியுள்ளார்.
தமிழில் ராஜாராணி திரைப்படத்தை இயக்கி இயக்குநராக அறிமுகமான அட்லீ, நடிகர் விஜயுடன் தெறி, மெர்சல், பிகில் முதலிய பிளாக்பஸ்டர் ஹிட் படங்களைக் கொடுத்துக் கவனிக்கும் படியான இயக்குநராக மாறினார்.
RelatedPosts
புஷ்பா 2 என்ற ஹிட் திரைப்படத்திற்கு பிறகு அல்லு அர்ஜுனின் 22வது படமாகவும், ஜவான் என்ற 1000 கோடி வசூல் திரைப்படத்திற்கு பிறகு அட்லீக்கு 6வது படமாகவும் உருவாகவிருக்கும் AA22xA6 என்ற புதிய படம், ஹாலிவுட் திரைக்கலைஞர்களை கொண்டு கிராஃபிக்ஸ் காட்சிகளுடன் பிரமாண்டமாக உருவாகவிருக்கிறது.
அதிலும் அல்லு அர்ஜுன் மற்றும் தீபிகா படுகோனே போன்ற மிகப்பெரிய நட்சத்திரங்கள் இணைந்திருப்பது, ரசிகர்களிடையே பெரும் எதிர்பார்ப்பை உருவாக்கியுள்ளது.
சந்தீப் ரெட்டி வங்கா – பிரபாஸ் இணைந்திருக்கும் ’ஸ்பிரிட்’ படத்தில் முதலில் தீபிகா படுகோனே நடிக்கவிருப்பதாகச் சொல்லப்பட்ட நிலையில், இயக்குநருக்கும்-தீபிகாவிற்கும் இடையேயான மோதலால் ஸ்பிரிட் படத்திலிருந்து நீக்கப்பட்டதாகத் தகவல் வெளியானது. அதனைத்தொடர்ந்து பிரபாஸின் மற்றொரு படமான ’கல்கி 2’ படத்திலிருந்தும் தீபிகா படுகோனே விலகலாம் என்ற தகவலும் கசிந்துள்ளது.
எனினும், இந்தப் புதிய இணைப்பு விரைவில் ரசிகர்கள் மத்தியில் வரவேற்கப்படும் எனப் பெரிதும் எதிர்பார்க்கப்படுகிறது.
இன்று வெளியான வீடியோவில், தீபிகா ஒரு ஸ்டைலிஷ் மற்றும் பவர் பாக் லுக்கில் காணப்படுகிறார். அதேசமயம், இதன் அதிகாரப்பூர்வ அறிவிப்பைச் சன் பிக்சர்ஸ் நிறுவனம் வீடியோவாக வெளியிட்டுள்ளது. அந்த வீடியோவில் அட்லீ, தீபிகாவிடம் கதையை விவரிப்பதை போலவும் அதற்கு அவர் சம்மதிப்பது போலவும் காட்சிகள் இடம்பெற்றுள்ளது. அட்லீயின் திரைக்காட்சி ஸ்டைல் ரசிகர்களைக் கவர்ந்துள்ளது.
“அட்லீ + அல்லு அர்ஜுன் + தீபிகா = ப்ளாக்பஸ்டர் காம்போ” என்று ரசிகர்கள் சமூக வலைதளங்களில் ட்ரெண்ட் செய்யத் தொடங்கியுள்ளனர். ரசிகர்கள் மத்தியில் இந்தப் படத்திற்கான எதிர்பார்ப்பு நாளுக்கு நாள் அதிகரித்து வருகிறது.
