நாம் தமிழர் கட்சி தலைமை ஒருங்கிணைப்பாளர் சீமான், சென்னை விமான நிலையத்தில் செய்தியாளர்களைச் சந்தித்து மதுரை பயணத்திற்கு முன்பு தீவிர பேட்டியொன்றை அளித்தார். பாஜகவின் சமீபத்திய முருகன் மாநாடு மற்றும் தமிழர் பண்பாடுகுறித்து அவர் கடுமையான கருத்துக்களை முன்வைத்தார்.
சீமான் பாஜகவை குற்றம் சாட்டி, “பாஜகவினர் முருகன் மாநாட்டைத் திட்டமிட்டு நடத்துகின்றனர். இந்து அமைப்புகள் தனித்தனியாக இல்லை; அனைத்தும் பாஜகவின் கிளை அமைப்புகளே. முதலில் விநாயகரை தூக்கி வந்தனர், தமிழ்நாட்டில் அது வெற்றி பெறவில்லை. இப்போது முருகனை கையில் எடுத்துள்ளனர். வட இந்தியாவில் ராமரை பயன்படுத்தினர், ஆனால் அயோத்தியில் தோல்வி அடைந்தனர். கேரளாவில் ஐயப்பனை முயன்றும் தோல்வியடைந்தனர்,” என்றார். அவர் மேலும் கூறுகையில், “பாஜக மக்களின் பிரச்சனைகளைத் தீர்ப்பதில்லை; பிரச்சனைகளை உருவாக்குபவர்கள்தான்.”
RelatedPosts
தமிழ் பண்பாட்டைப் பாஜக பயன்படுத்துவதாகக் குற்றம்சாட்டிய சீமான், “திருவள்ளுவருக்கு காவி சீலை கட்ட முயன்றனர், அது எடுபடவில்லை. இப்போது தமிழர் இறையான முருகரை தொட்டுப் பார்க்கின்றனர். திருப்பரங்குன்றம் மலை சிக்கலைக் கையில் எடுத்துள்ளனர். ஆனால், எங்கள் இறை பழனிச்சாமியை வணங்கி, அவரது பின்னால் தான் நிற்க வேண்டும்,” என்று உறுதியாகத் தெரிவித்தார். மேலும், “முருகனுக்கு தமிழில் மந்திரம் ஓத வேண்டும், திருப்புகழ் பாட வேண்டும். இந்த மாநாடு இதை வலியுறுத்துமா?” என்று கேள்வி எழுப்பினார்.
ஒரே மொழி கொள்கையை எதிர்த்த சீமான், “ஆங்கிலத்தை விட்டு ஹிந்தியை மட்டும் படித்தால் மற்ற நாடுகளுக்குச் செல்ல முடியுமா? அனைத்து மொழிகளையும் அழித்து ஒரே மொழியை நிலைநாட்டுவது தேச ஒற்றுமைக்கு எதிரானது,” என்றார். மத்திய உள்துறை அமைச்சர் அமித்ஷாவின் ‘இந்து ஒற்றுமை’ பேச்சை விமர்சித்து, “இது மக்களை மதங்களால் பிரிக்கும் செயல். இந்து நாடுகளுடன் மட்டும் தொடர்பு வைத்திருப்பதா இந்தியா? மற்ற நாடுகளில் இந்துக் கோயில்கள் அனுமதிக்கப்படுகின்றன, இங்கு ஏன் இல்லை?” என்று கேள்வி எழுப்பினார்.
உலக அரசியல் குறித்து பேசிய அவர், “மூன்றாம் உலகப்போர் நீர் வேட்டைக்காக நடக்கும். தற்போது எண்ணைக்காகப் போர் நடக்கிறது. 22 நாடுகள் இணைந்து தமிழீழ விடுதலைப் புலிகளை வீழ்த்தின, அது ஒரு உலகப்போர். வல்லாதிக்க நாடுகள் எளிய நாடுகளை வேட்டையாடி அழிக்கின்றன. அமெரிக்கா ரஷ்யாவுடன் போரில் குதிக்காமல் இருக்க வேண்டும்,” என்று எச்சரிக்கை விடுத்தார்.
தமிழ்நாட்டின் வளங்கள்குறித்து சீமான் கூறியதாவது, “இந்தியா தமிழ்நாட்டிலிருந்து மீத்தேன், எத்தேன், நிலக்கரி போன்ற வளங்களைச் சுரண்டி செல்கிறது. எங்கள் வாழ்விடத்தை இழந்து அகதிகளாக அலையும் நிலை ஏற்பட்டுள்ளது.” தனது தேசிய விடுதலைப் பயணத்தில் மொழி, இனம், கலை, இலக்கியம் மற்றும் பண்பாட்டை மீட்கும் முயற்சியை வலியுறுத்தினார். இவ்வாறு சீமானின் பேச்சு தமிழ் பண்பாடு, அரசியல் மற்றும் உலக அரங்கில் தமிழரின் நிலையை மையமாகக் கொண்டு பல்வேறு விவாதங்களைத் தூண்டியுள்ளது.
# # # #
