சிவகங்கை மாவட்டத்தில் உள்ள கீழடி, தமிழர்களின் பண்டைய நாகரிகத்தை வெளிப்படுத்திய முக்கியமான தொல்லியல் தளமாகும். கி.மு. 6-ஆம் நூற்றாண்டுக்கு முந்தைய நகர கட்டமைப்பு, தமிழ்-பிராமி எழுத்து பொறிக்கப்பட்ட பானை ஓடுகள் உள்ளிட்ட 15,000-க்கும் மேற்பட்ட தொல்பொருட்களை அகழாய்வின் மூலம் கண்டறிந்தவர் தொல்லியல் ஆய்வாளர் அமர்நாத் ராமகிருஷ்ணன்.
இவரது 982 பக்க அறிக்கை 2023-இல் மத்திய தொல்லியல் துறைக்கு (ASI) சமர்ப்பிக்கப்பட்டது. ஆனால், இந்த அறிக்கை இன்னும் வெளியிடப்படவில்லை, இது தமிழகத்தில் பெரும் விவாதத்தைக் கிளப்பியுள்ளது.
இதனைத் தொடர்ந்து ஜூன் 17, 2025 அன்று, அமர்நாத் ராமகிருஷ்ணன் டெல்லியிலிருந்து நொய்டாவுக்கு இடமாற்றம் செய்யப்பட்டார். இந்த முடிவு தமிழகத்தில் அதிர்ச்சியையும், கடும் எதிர்ப்பையும் ஏற்படுத்தியுள்ளது.
மதுரை எம்.பி. சு. வெங்கடேசன், “கீழடி உண்மைகளை வெளிக்கொண்டு வந்ததற்காக அமர்நாத் தண்டிக்கப்படுகிறார்” எனக் குற்றம்சாட்டினார். கீழடியில் கிடைத்த 60-க்கும் மேற்பட்ட தமிழ்-பிராமி எழுத்து பொறிக்கப்பட்ட பானை ஓடுகள் மற்றும் 1,500-க்கும் மேற்பட்ட குறியீடு பொறிக்கப்பட்ட பொருட்கள், தமிழர்களின் எழுத்தறிவு மற்றும் நகர நாகரிகத்தை உறுதிப்படுத்துகின்றன.
2023-இல் முதல்வர் ஸ்டாலினால் கீழடி அருங்காட்சியகம் திறக்கப்பட்டது. தற்போது, தமிழக தொல்லியல் துறை 10-ஆம் கட்ட அகழாய்வை மேற்கொண்டு வருகிறது.
ASI, அமர்நாத்தின் அறிக்கையை “நம்பகத்தன்மை” காரணமாக இரு நிபுணர்களிடம் அனுப்பி கேள்விகளை எழுப்பியது, சர்ச்சையை ஏற்படுத்தியுள்ளது. இடமாற்றமும், அறிக்கை வெளியீட்டில் தாமதமும் தமிழர்களின் தொன்மையை மறைக்கும் முயற்சியாகப் பார்க்கப்படுகிறது.
அமர்நாத்தின் இடமாற்றம் கீழடி ஆய்வுக்குப் பின்னடைவாக அமையலாமெனத் தமிழக மக்கள் அஞ்சுகின்றனர். மத்திய அரசு வெளிப்படையான அணுகுமுறையைக் கடைப்பிடித்து, கீழடி அறிக்கையை விரைவாக வெளியிட வேண்டும் என வலியுறுத்தப்படுகிறது.
